Ydych chi erioed wedi ystyried gwneud gwahaniaeth parhaol ym mywyd plentyn? Maethu yw un o’r ffyrdd mwyaf gwerth chweil o gefnogi plant a phobl ifanc y mae angen cartref diogel, sefydlog a gofalgar arnynt. Ar draws Abertawe, mae gofalwyr yn chwarae rôl hanfodol wrth helpu plant i ffynnu a chyrraedd eu potensial llawn.
Mae’r angen am ofalwyr maeth yn fwy nag erioed. Mae angen cartrefi diogel a chefnogol ar fwy o blant a phobl ifanc nag erioed, ac mae Maethu Cymru Abertawe’n chwilio am unigolion a theuluoedd tosturiol a all ddarparu’r gofal sydd ei angen arnynt.
Os ydych chi’n meddwl am faethu, gall deall y broses eich helpu i gymryd y cam cyntaf yn hyderus. Dyma arweiniad syml i ddod yn ofalwr maeth gyda Maethu Cymru Abertawe.
pam maethu yn abertawe?
Mae maethu yn ymwneud â darparu cartref diogel, cefnogol a meithringar i blant nad ydynt yn gallu byw gyda’u teuluoedd geni am sawl rheswm.
Ar draws Abertawe a Chymru, mae angen cynyddol am ofalwyr maeth o bob cefndir. Drwy faethu’n lleol, rydych chi’n helpu plant i gadw mewn cysylltiad â’u hysgolion, eu ffrindiau a’u cymunedau – rhywbeth a all wneud gwahaniaeth mawr yn ystod cyfnod anodd.
pwy all ddod yn ofalwr maeth?
Efallai y byddwch chi’n synnu ar ba mor gynhwysol yw maethu. Gallwch wneud cais i ddod yn ofalwr maeth os yw’r canlynol yn berthnasol i chi:
- Rydych chi’n 18 oed ac yn hŷn
- Mae gennych ystafell wely sbâr
- Mae eich iechyd yn dda yn gyffredinol
Ond yn bwysicaf oll, mae angen pobl arnom a all gynnig cartref sefydlog, gofalgar.
Does dim ots a ydych chi’n:
- Sengl, yn briod neu mewn perthynas
- Yn gweithio neu ddim yn gweithio
- Yn rhentu neu’n berchen ar eich cartref
Mae maethu yn ymwneud â’ch gallu i ofalu, cefnogi a meithrin – nid bodloni disgwyliadau penodol yn unig.
Am ragor o wybodaeth am bwy all faethu, darllenwch ein blog yma.
proses gam wrth gam i ddod yn ofalwr maeth yn abertawe
Nod y broses faethu yw sicrhau eich bod chi’n teimlo’n barod, yn hyderus, a’ch bod yn cael eich cefnogi cyn croesawu plentyn i’ch cartref. Mae’n ymwneud â sicrhau bod maethu yn iawn i chi a’ch aelwyd.
1. gwneud ymholiad
Mae eich taith yn dechrau gydag ymholiad syml.
- Byddwch yn cael sgwrs anffurfiol ag aelod o’r tîm
- Gallwch ofyn llawer o gwestiynau (os oes gennych rai)
- Byddwch yn dysgu beth i’w ddisgwyl o faethu
- Byddwch yn llenwi ffurflen mynegi diddordeb fer
Dim pwysau – dim ond cyfle i archwilio eich opsiynau.
Ar y cam hwn, byddwn yn cwblhau gwiriadau’r awdurdod lleol.
2. ymweliad cartref cychwynnol
Nesaf, bydd aelod o’r tîm maethu yn ymweld â’ch cartref i ddod i’ch adnabod yn well.
Cyfarfod hamddenol a chyfeillgar yw hwn lle byddwn yn:
- Trafod eich diddordeb mewn maethu
- Edrych o gwmpas eich cartref, gan gynnwys yr ystafell/ystafelloedd gwely y gallwch eu defnyddio ar gyfer maethu
- Cwrdd â’r bobl rydych chi’n byw gyda nhw
- Siarad am y gwahanol fathau o faethu sydd ar gael
- Ateb unrhyw gwestiynau sydd gennych
Mae’n ymwneud â dod i adnabod ein gilydd a gweld os yw maethu yn addas i chi.
3. hyfforddiant sgiliau i faethu
Cyn symud ymlaen, byddwch yn mynychu cwrs deuddydd Sgiliau i Faethu.
Mae’r hyfforddiant hwn yn rhoi:
- Mewnwelediad i rôl gofalwr maeth
- Dealltwriaeth o anghenion a phrofiadau plant
- Amser i benderfynu a yw maethu yn iawn i chi
Ar ôl cwblhau’r hyfforddiant, cewch eich gwahodd i fynd i gyfarfod cwrdd a chyfarch gyda’r ymgeiswyr eraill, lle rhoddir cyfle i chi gwrdd â nifer o’n gofalwyr maeth.
Hyd yn oed ar y cam hwn, nid oes unrhyw rwymedigaeth i barhau â’r broses – mae’n ymwneud â gwneud penderfyniad gwybodus.
4. asesiad (ffurflen f)
Dyma gam mwyaf manwl y broses, ac ni fyddwch yn mynd drwyddo ar eich pen eich hun.
Cewch eich cefnogi gan weithiwr cymdeithasol asesu neilltuedig o’r tîm maethu a fydd yn:
- Ymweld â chi’n rheolaidd
- Dod i’ch adnabod chi a’ch teulu – mae hyn yn cynnwys penderfynu pa fathau o faethu sy’n gweddu orau i’ch ffordd o fyw a’ch teulu
- Llenwi’r asesiad Ffurflen F gyda’ch gilydd
Sylwer: Os oes gennych eich plant eich hun, yna byddant yn cymryd rhan yn yr asesiad hwn. Mae’n bwysig eu bod nhw’n gwbl gefnogol o faethu. Ein nod yw eu paratoi ar gyfer maethu cymaint â phosib – fel yr ydyn ni’n ei wneud i chi.
Yn ystod y cam hwn, cynhelir sawl gwiriad, gan gynnwys:
- Gwiriadau’r GDG (cofnod troseddol)
- Asesiad meddygol gan feddyg teulu
- Geirdaon personol a chyflogwyr
- Gwiriadau’r awdurdod lleol a diogelu
- Gwiriad iechyd a diogelwch yn y cartref
Byddwch yn dod i adnabod eich gilydd yn dda a bydd yn llenwi’ch adroddiad asesu gyda chi. Gyda’ch gilydd, byddwch yn trafod pa fathau o faethu sy’n gweddu orau i’ch ffordd o fyw a’ch teulu, a’r plant a’r bobl ifanc y byddwch yn cael eich paru orau â nhw.
Mae’r broses drylwyr hon yn sicrhau diogelwch a lles plant – ac yn eich helpu chi i baratoi ar gyfer maethu bywyd go iawn.
5. panel maethu
Unwaith y bydd eich gweithiwr cymdeithasol wedi cwblhau eich asesiad, byddwch yn mynychu Panel Maethu.
Mae aelodau’r panel yn cynnwys gofalwyr maeth, gweithwyr cymdeithasol, gweithwyr proffesiynol addysg ac iechyd, cynrychiolwyr annibynnol, cynghorwyr ac eraill.
- Ni fyddwch yn mynychu Panel Maethu ar eich pen eich hun – bydd eich gweithiwr cymdeithasol asesu yno i’ch cefnogi chi
- Bydd aelodau’r panel yn gofyn cwestiynau yn seiliedig ar eich asesiad
- Bydd argymhelliad yn cael ei wneud ynghylch eich cymeradwyo
Bydd yr atebion a roddwch yn helpu’r panel i benderfynu a ddylid eich cymeradwyo fel gofalwr maeth ai peidio. Er y gall swnio’n frawychus, mae’n sgwrs gefnogol a syml.
6. cymeradwyaeth
Gwneir y penderfyniad terfynol yn fuan ar ôl y panel – fel arfer o fewn 1–2 wythnos.
Gwneir y penderfyniad terfynol gan Wneuthurwr Penderfyniadau’r Asiantaeth, fel arfer Pennaeth y Gwasanaeth ar gyfer y Gwasanaethau Plant a Theuluoedd.
Os cymeradwyir y cais:
- Byddwch yn dod yn ofalwr maeth yn swyddogol
- Byddwch yn derbyn eich telerau cymeradwyaeth
- Byddwch yn barod i groesawu plentyn i’ch cartref
7. paru a’ch lleoliad cyntaf
Ar ôl i chi gael eich cymeradwyo, bydd y tîm yn eich paru’n ofalus â phlentyn neu berson ifanc. Mewn gwirionedd, mae’n debyg na fydd hyn yn hir ar ôl i chi gael eich cymeradwyo. Weithiau rydym yn paru ymgeiswyr â phlant cyn iddynt gael eu cymeradwyo’n ffurfiol.
Byddwch yn derbyn:
- Yr wybodaeth lawn am y plentyn
- Cefnogaeth gan eich gweithiwr cymdeithasol goruchwylio
- Hyfforddiant ac arweiniad parhaus
- Lwfansau ariannol
Lle bo’n bosib, efallai y byddwch chi’n cwrdd â’r plentyn ymlaen llaw – ond mewn argyfwng, gellir trefnu lleoliadau yn gyflymach.
pa mor hir mae’n ei gymryd i ddod yn ofalwr maeth?
Mae’r broses fel arfer yn cymryd 4-6 mis o’ch ymholiad cychwynnol i’ch cymeradwyo.
Weithiau gall hyn gymryd mwy o amser ond mae hyn yn aml oherwydd argaeledd yr ymgeisydd neu oedi wrth aros am eirdaon neu wrth gysylltu â gweithwyr meddygol. Beth bynnag fo’r rheswm dros yr oedi, byddwn yn eich hysbysu’n rheolaidd.
ar ôl i mi gael ymweliad cartref a/neu fynd ar y cwrs hyfforddiant cyn cymeradwyo sgiliau i faethu, ydw i’n ymrwymo i barhau â’r broses faethu os nad wyf yn sicr mai dyma’r amser iawn i faethu?
Dim o gwbl. Rydym eisiau i bawb sy’n maethu deimlo’n gwbl hyderus am eu penderfyniad. Os oes gennych unrhyw bryderon neu os ydych chi’n teimlo nad yw’r amser yn iawn, nid oes unrhyw bwysau o gwbl i barhau.
Os yw maethu’n rhywbeth rydych chi’n gwybod yr hoffech chi ei wneud yn y dyfodol, ond rydych chi’n brysur gydag ymrwymiadau gwaith, materion iechyd, cyfrifoldebau teuluol neu’n cefnogi eich plant eich hun ar hyn o bryd, gallwn oedi eich cais. Byddwn yn cadw mewn cysylltiad ac yn ailgysylltu â chi pan fyddwch chi’n barod i barhau o’r man lle gadawoch.
Byddwn ni byth yn rhoi unrhyw bwysau arnoch – rydyn ni yma i’ch arwain a’ch cefnogi chi.
a yw’n costio unrhyw beth i faethu?
Nac ydy – mae’n rhad ac am ddim i ddod yn ofalwr maeth.
Mae Maethu Cymru Abertawe’n cwmpasu:
- Gwiriadau’r GDG
- Costau meddygol meddygon teulu
- Hyfforddiant a pharatoi
Ar ôl eich cymeradwyo, byddwch hefyd yn derbyn:
- Lwfansau ariannol
- Cefnogaeth 24/7
- Hyfforddiant a datblygiad parhaus
pam maethu gyda maethu cymru abertawe?
Mae dewis maethu gyda’ch awdurdod lleol yn golygu:
- Eich bod yn rhan o wasanaeth nid er elw
- Bod plant yn cael aros yn eu cymuned leol
- Y byddwch yn derbyn cefnogaeth ymroddedig, leol
cefnogaeth ar bob cam o’r ffordd
Un o’r camdybiaethau mwyaf am faethu yw eich bod chi’n cael eich gadael i ymdopi ar eich pen eich hun – dydy hyn ddim yn wir.
Gyda Maethu Cymru Abertawe, byddwch yn derbyn cefnogaeth barhaus, gan gynnwys:
- Gweithiwr cymdeithasol goruchwylio neilltuedig
- Gweithiwr cymorth neilltuedig
- Cefnogaeth 24/7 y tu allan i oriau
- Cyfleoedd hyfforddiant parhaus
- Mynediad at rwydwaith o ofalwyr maeth eraill
- Grwpiau a digwyddiadau cefnogi
Am ragor o wybodaeth am y gefnogaeth y byddwch chi’n ei derbyn, darllenwch ein blog.
Cewch eich cefnogi o’ch ymholiad cyntaf – a thrwy gydol eich taith faethu.
eisoes yn ofalwr maeth?
Os ydych chi’n maethu gydag asiantaeth arall, gallwch drosglwyddo i Faethu Cymru Abertawe.
Bydd y tîm yn eich arwain drwy’r broses ac yn gwneud y broses bontio mor llyfn â phosib.
cymerwch y cam cyntaf
Mae dod yn ofalwr maeth yn benderfyniad sy’n newid bywyd – i chi a’r plentyn rydych chi’n ei gefnogi.
Gall y broses deimlo’n fanwl, ond ei nod yw:
- Eich paratoi chi’n llawn
- Cefnogi eich teulu
- Sicrhau’r canlyniadau gorau i blant
Os gallwch gynnig cartref diogel, gofalgar, gallech wneud gwahaniaeth parhaol.
yn barod i ddechrau ar eich taith?
Cysylltwch â Maethu Cymru Abertawe heddiw:
- Ffoniwch 0300 555 0111
- Gofynnwch am alwad yn ôl: Defnyddiwch ein ffurflen gyswllt ar-lein
Gallai eich taith i faethu ddechrau gyda sgwrs syml.
