Ar ôl gwasanaethu 35 mlynedd yn y Fyddin, dechreuodd Shirley feddwl am ei phennod nesaf tra oedd ar ei chyfnod gwasanaeth olaf yn yr Almaen.
Wrth iddi ddechrau ystyried y bennod nesaf yn ei bywyd, daeth un nod yn glir – roedd hi eisiau gwneud gwahaniaeth ym mywydau plant.
“Wrth ystyried dychwelyd i Brydain, helpu plant mewn rhyw ffordd oedd yn mynd â’m bryd i gyd. Tynnodd rhywun fy sylw at faethu i mi a dyna blannu’r had.”
Yn benderfynol o droi’r syniadau hynny’n realiti, dyma hi’n dechrau gwneud ymholiadau cychwynnol tra oedd hi’n dal i fyw yn yr Almaen, gan ddangos ymrwymiad cryf hyd yn oed cyn dychwelyd adref i Gymru.
dechrau’r daith yn abertawe
Ar ôl symud i Dde Cymru gyda’i theulu ac ymgynefino â threfn newydd, estynnodd Shirley allan i Foster Wales Abertawe.
Doedd hi ddim yn hir cyn iddi wybod bod yr amser yn iawn i ymrwymo’n llawn i faethu, gan gymryd y cam pwysig hwnnw i ddechrau ei chais.
dros ddegawd o faethu
Gyda dros 10 mlynedd o brofiad, mae Shirley yn adfyfyrio ar faethu fel taith drawsnewidiol a gwerth chweil.
“Does dim byd yn eich paratoi chi ar gyfer y person cyntaf sy’n dod trwy’ch drws. Mae angen amynedd, dealltwriaeth, cariad, ymrwymiad a chofio bod pob plentyn yn wahanol gydag anghenion gwahanol.”
Mae hi’n pwysleisio bod pob plentyn yn unigryw, pob un â’i anghenion a’i brofiadau ei hun, a bod angen gofal sy’n gyson, yn dosturiol ac wedi’i deilwra.
newid bywyd person ifanc
Daeth un o brofiadau mwyaf ystyrlon Shirley o’i lleoliad cyntaf – bachgen 11 oed a oedd wedi wynebu ansefydlogrwydd a gwrthod.
Ar ôl profiad anodd mewn lleoliad blaenorol, daeth i fyw gyda Shirley. Gyda’r cymorth, y gofal a’r sefydlogrwydd cywir, dyma fe’n dechrau ffynnu.
“Parhaodd i fyw gyda mi nes ei fod yn 20 oed. Mae’n dal i ddod adref am wyliau a’r Nadolig ac yn ystyried fy nghartref i’n gartref iddo yntau.”
I Shirley, dyma beth yw maethu.
“Llwyddiant yw hyn, i mi, ac mae’n cadarnhau y gall gwaith caled, cariad, diogelwch ac arweiniad drawsnewid person ifanc.”
budd maethu
Mae darparu cartref diogel, sefydlog wrth wraidd cymhelliant Shirley.
“Budd maethu yw rhoi cartref diogel a sicr i blentyn dyfu i fyny ynddo.”
Mae ei phrofiad yn dangos yr effaith barhaol y gall amgylchedd cefnogol ei chael – nid yn unig yn ystod plentyndod, ond ymhell i mewn i’w bywyd yn oedolion.
myfyrdodau gonest ar y rôl
Mae Shirley yn glir y gall maethu fod yn heriol ar adegau. Gall plant mewn gofal ddod â phrofiadau o drawma, colled a gwrthodiad.
Fodd bynnag, mae’r buddion yn llawer mwy na’r heriau.
“Weithiau gall fod yn anodd iawn gan fod plant mewn gofal yn dod â thrawma a gwrthodiad ond os gallwch chi droi pethau o gwmpas i blentyn, rydych chi wedi bod yn llwyddiant.”
pwysigrwydd cymorth
I Shirley, mae’r cymorth a gaiff hi gan Faethu Cymru Abertawe wedi bod yn allweddol i’w llwyddiant hi’n ofalwr maeth.
“Cymorth gan Faethu Cymru Abertawe yw’r allwedd i fod yn ofalwr maeth effeithiol.”
O arweiniad drwy’r broses i hyfforddiant parhaus, mae’n tynnu sylw at ba mor hanfodol yw teimlo bod gennych chi gymorth bob cam o’r ffordd.
cyngor i ddarpar ofalwyr maeth
I’r rhai sy’n ystyried maethu, mae Shirley yn cynnig cyngor syml ond pwerus:
“Rhowch gynnig arni. Mae’n sicr o’ch cadw chi ar eich traed, ond mae’r budd yn llawer mwy na phopeth arall.”
Mae hi’n argymell yn gryf Faethu Cymru Abertawe am eu hymrwymiad i gefnogi gofalwyr a darparu cyfleoedd hyfforddi parhaus.
“Maen nhw’n ymroddedig ac yn gefnogol i chi ac yn buddsoddi mewn cyrsiau i sicrhau bod y wybodaeth ddiweddaraf gyda chi bob blwyddyn.”
oes gennych chi ddiddordeb mewn maethu?
Os ydych chi’n meddwl am faethu ond os hoffech ragor o wybodaeth am sut y gall gyd-fynd â deinameg neu ffordd o fyw eich teulu, cysylltwch â Maethu Cymru Abertawe heddiw!
Gallwn ni esbonio’r rôl, y broses, y cymorth rydyn ni’n ei ddarparu i’n gofalwyr maeth, a helpu i leddfu unrhyw bryderon sydd gennych chi o ran eich addasrwydd.
Cysylltwch â ni heddiw am drafodaeth anffurfiol.
Gallwch chi gael yr atebion i gwestiynau cyffredin yma.
Gallwch chi hefyd ddysgu rhagor am y chwedlau ynghylch maethu yma.
