Pan roedd Abbie Morgan yn 13 oed, penderfynodd ei rhieni ddod yn ofalwyr maeth. Ar y dechrau, doedd hi ddim yn siŵr beth i’w ddisgwyl. Roedd meddwl am groesawu plant nad oedd hi’n eu hadnabod i’w chartref yn teimlo’n frawychus, ac roedd hi’n meddwl tybed faint y byddai bywyd teuluol yn newid.
Heddiw, ar ôl cael ei magu mewn teulu maeth, mae Abbie yn paratoi ar gyfer pennod newydd gyffrous. Mae hi a’i chariad yn cael eu hasesu ar hyn o bryd i ddod yn ofalwyr maeth eu hunain.
yn nerfus ar y dechrau, ond yn fuan yn teimlo fel teulu mwy
Wrth fyfyrio ar benderfyniad ei rhieni i faethu, mae Abbie yn cofio teimlo’n nerfus ynglŷn â sut beth byddai’r dyfodol.
“Roeddwn i’n ifanc ac roedd yn eithaf brawychus meddwl am sut y gallai pethau newid, sut fath o gartref byddai gennym a sut fath o ddyddiau a dathliadau y byddem yn eu cael yn y dyfodol.”
Fodd bynnag, darganfu’n gyflym nad oedd maethu’n newid hanfod ei theulu yn y bôn.
“Wrth edrych yn ôl, y newid mwyaf oedd bod ein teulu wedi tyfu. Fe groesawon ni blant newydd i’n cartref ac addason ni gyda’n gilydd fel teulu, a chyn bo hir daeth yn rhan normal o’n bywydau.”
dysgu empathi a dealltwriaeth
Tyfu i fyny ochr yn ochr â phlant o wahanol gefndiroedd a phrofiadau helpodd i lunio’r math o berson yw Abbie heddiw. Roedd maethu wedi’i helpu i ddatblygu empathi, tosturi a dealltwriaeth ddyfnach o’r heriau y mae rhai plant a phobl ifanc yn eu hwynebu.
“Mae bod yn rhan o deulu maeth wedi fy helpu i ddatblygu ymdeimlad cryf o empathi a thosturi. Gwnaeth fy annog i ddilyn gyrfa mewn gofal cymdeithasol ac fe ddylanwadodd ar y math o berson ydw i heddiw”
Mae Abbie yn dweud bod maethu wedi dysgu iddi fod pob plentyn yn wahanol ac y gall hyd yn oed gweithredoedd bach o garedigrwydd a chefnogaeth gael effaith barhaol.
y rhan anoddaf a’r rhan fwyaf gwerth chweil
Fel llawer o deuluoedd maeth, yn aml ffarwelio oedd yr agwedd anoddaf i Abbie a’i theulu. P’un a oedd plant yn symud ymlaen i gael eu mabwysiadu, yn symud i leoliad maeth arall neu’n dychwelyd at aelodau o’r teulu, roedd y trawsnewidiadau’n emosiynol.
“Fel teulu maeth, rydych chi’n adeiladu perthynas glos â’r plant ac yn naturiol yn dod yn hoff iawn ohonynt, felly gall fod yn anodd pan ddaw’r amser iddyn nhw symud ymlaen.”
Er gwaethaf hyn, dywed Abbie fod gwobrau maethu yn llawer mwy na’r heriau.
“Mae’n werth chweil gweld plentyn yn magu hyder, yn dechrau ymddiried mewn pobl ac yn teimlo’n gyfforddus ac yn hapus yn ei amgylchedd.”
Iddi hi, gwybod bod plentyn yn teimlo’n ddiogel, yn cael ei garu a’i gefnogi yw un o’r gwobrau mwyaf y gall teulu maeth ei brofi.
cyngor i deuluoedd sy’n ystyried maethu
Mae Abbie yn deall bod rhai rhieni’n poeni am sut y gall maethu effeithio ar eu plant eu hunain. Mae ei chyngor yn syml: ewch ati i’w cynnwys o’r dechrau.
“Rwy’n credu ei bod hi’n bwysig cynnwys eich plant eich hun gymaint â phosib yn y broses faethu. Rhowch lais iddyn nhw hefyd ac ystyriwch sut y gall lleoliad effeithio arnyn nhw.”
Mae hi’n credu, pan fydd plant yn cael eu cynnwys a’u cefnogi, y gall maethu fod yn brofiad cadarnhaol i’r teulu cyfan.
dilyn yn ôl troed ei rhieni
Ar ôl gweld â’i llygaid ei hun y gwahaniaeth y gall gofalwyr maeth ei wneud i fywyd plentyn, roedd Abbie bob amser yn gwybod bod maethu’n rhywbeth y gallai hi ryw ddydd fynd ar ei drywydd.
“Mae cael fy magu mewn teulu sy’n maethu wedi cael dylanwad enfawr ar fy mhenderfyniad i ddod yn ofalwr maeth fy hun.”
“Mae gweld fy rhieni’n maethu a’r gwahaniaeth maen nhw wedi gallu’i wneud ym mywydau’r plant hyn wedi dangos i fi mor bwysig yw darparu cartref diogel, cariadus a chefnogol.”
Nawr, wrth iddi hi a’i chariad ddechrau eu taith faethu eu hunain, mae Abbie yn gobeithio cynnig yr un ymdeimlad o ddiogelwch, sefydlogrwydd a pherthyn i blant ag a welodd ei rhieni’n ei roi drwy gydol ei phlentyndod.
allech chi wneud gwahaniaeth?
Mae stori Abbie yn dangos nad yw maethu’n newid bywydau’r plant y mae angen gofal a chefnogaeth arnynt yn unig. Gall hefyd gael effaith barhaol a chadarnhaol ar y teuluoedd sy’n maethu, gan ysbrydoli cenedlaethau’r dyfodol i wneud gwahaniaeth hefyd.
I gael gwybod mwy am ddod yn ofalwr maeth gyda Maethu Cymru Abertawe, cysylltwch â’n tîm heddiw.
Ffoniwch Maethu Cymru Abertawe ar 0300 555 0111 i gael sgwrs gyfeillgar, heb bwysau neu cysylltwch â ni yma.
